Oenne Körch.

[-sd-]

Oenne Körch.

De Emma Matull on de Lina Krakuhn,
Dät weere twee ohle Scharteke.
So wie disse beide fundst keine nich mehr,
On deedst ook meilewiet seeke.
Tohus, doa haude se rom möttem Schlorr
On schmeete möt Töpp on möt Emmer,
Doch huckde se eerscht önne Körchebank,
Denn weere se toahm wie de Lämmer.
Se huckde all ömmer e Stund värut
On kunnde nich feeh genug goahne,
On fing de Herr Pforr eerscht ot räde an,
Dänn huulde se soltige Troane.
So weer’t alle Sinndag. De Pfarr, dä rädt
Von Sinde on Buße on Leide,
Denn soppde de Troane tom Oppwösche foorts,
So huulde on griende dä beide.
Bloss eenem Sinndag, doa weer he verreist –
He leet söck e Wärtel teehne, -
Doa keem e Pfarr utem andere Därp,
Dat hadde dä twee nich gesehne.
He stund oppe Kanzel on rädt vonne Höll,
Von Busse on Strafe on Sinde,
E halwe Stund rein drelld he dat Woort
Dreemoal von värne on hinde.
On onse twee dä huulde söck ut
Wie ömmer ön Not on ön Quoale,
Doa kickd de Krakuhnsche möt eent önne Höcht
On mussd nu man Lofft eerscht hoale.
Denn sächt se: „Du, Emma, dat ös er joa nich,
Dat ös nich ons Pfarr, ons fromme!“
„Joa schiet“, sächt de Emma, de Oarm önne Sied,
„Wat griene wie denn wie de Domme!“

Quelle: OSTPREUSSEN-WARTE, August 1953